Suspendido ang face-to-face classes sa mga public schools sa bilog nga Pilipinas subong nga adlaw, Abril 15, tubtub buwas, Abril 16.
Ini base sa anunsyo sang Department of Education (DepEd) kun sa diin ginpahayag man nga asynchronous classes/distance learning ang ipatuman agud nga makumpleto sang mga estudyante ang pending nga mga assignments, proyekto, kag iban pa nga requirements.
Ginmando naman sang ahensya nga indi na magbalik sa eskwelahan ang mga teaching kag non-teaching personnel sa tanan nga mga public schools.
Mahimo naman nga dayunon ang mga aktibidad nga gin-organisar sang Regional kag Schools Division Offices kaangay sang Regional Athletic Association Meets kag iban pa nga division ukon school level programs nga naka-schedule sa nasambit nga mga petsa.
Indi sakop sini nga order ang mga private schools apang may option man suno sa ahensya nga magpatuman sang asynchronous classes/distance learning
Una na nga ginpahayag sang DepEd sang Byernes nga masobra 7,000 na ka mga eskwelahan sa bilog nga pungsod ang nagsuspende sang in-person ukon ang face to face classes kag nag-shift sa alternative modes bangud delikado ang tuman ka init nga tyempo.
Sa private schools sa syudad sang Iloilo, una na nga ginpahayag ni Iloilo City Mayor Jerry Treñas sa iya latest executive order nga mahimo nga maka-balik sa face-to-face classes depende sa ila nga school head/administrator kag kun may aircon ang mga classrooms.#
(Photo by Jesse Bustos)
