Tuman nga ginkadismaya sang mga miyembro sang Filipino community sa Nevada, USA ang pagkaulamid sang isa ka Filipino-American nurse sa ginakabig isa sa pinakamadako nga health care fraud schemes sa Amerika nga nagbiktima sang mga tigulang nga benepisyaryo sang Medicare, kalakip ang mga pasyente nga may terminal illness.

Ang amo nga nurse amo si Marizel Cambri Yukee, tumandok sang Tuguegarao City, Cagayan kag residente sang Las Vegas, Nevada.

Siya gin-akusahan bilang utok sang isa ka health care fraud operation nga nagpasa sang kapin P51 bilyon nga balor sang peke nga reimbursement claims sa Medicare kag TRICARE.

Suno kay Bombo Raul Sabido, intl correspondent sa Nevada, malapit niya nga abyan si Yukee kag pamilya sini kag ginlaragway niya ini nga mabuot nga tawo.

Suno kay Sabido, nagkaupod sila sa University Medical Center sa Southern Nevada sang 2003, kag sang 2014, nangin manager si Yukee sa Pediatrics ER sang nasambit nga ospital kag halos regular sila nga nagaupdanay sa mga events.

Suno pa sa iya, gintanyagan pa siya ni Yukee sadto agud magtrabaho para sa iya apang wala gindayon ni Sabido.

Kaangot naman sa kaso nga ginaatubang ni Yukee, ginsiling ni Sabido nga dako nga kahuy-anan para sa mga Fil-Am ang ginhimo ni Yukee.

Nahibaluan nga base sa kaso, masobra 906 milyon ka dolyar ang balor sang peke nga reimbursement claims nga ginsumite sang grupo ni Yukee halin sang Oktubre 2023 tubtob Abril 2026, kun sa diin kapin 297 milyon ka dolyar ang nabayad sang Medicare kag TRICARE.

Suno sa mga prosecutor, gin-gamit ni Yukee ang kwarta para sa iya magarbo nga pangabuhi, pagbakal sang malahalon nga salakyan, pagbakal sang balay sa Hawaii, kag pagpatukod sang isa ka beach resort sa Sta. Ana, Cagayan.

Ginatinguhaan subong sang otoridad nga makumpiska ang mga propedad ni Yukee.

Nakasaad man sa kaso nga naghatag ini sang ilegal nga kickbacks kag suhol sa mga health care providers agud i-refer sa ila nga mga klinika ang mga benepisyaryo sang Medicare kag TRICARE.

Si Yukee isa ka lisensyado nga nurse practitioner sa Nevada kag nagapanag-iya sang apat ka wound care clinics nga ginagamit sa operasyon.