ILOILO – Importante nga tsekyaron ang air conditioning units sang mga balay kag pampubliko nga establisemento agud malikawan ang mataas nga risgo sang coronavirus disease 2019 (COVID-19) infection.
Sa interview sang Bombo Radyo kay Engineer Nilo Jardeleza, tiglawas sang non-government organization nga Philippine Institute of Civil Engineers, iya ginpahayag nga delikado ang paglibot-libot sang hangin sa isa ka lugar ilabi na bangud tuman ka gamay nga particle ang new coronavirus kag madasig maglaton.
Ginpahayag ni Jardeleza nga nagakinahanglan nga i-install ang ventilators kag air filters nga amo ang magasala sang virus sa mga balay, restaurants, eskwelahan, ospital, salakyan, call centers, kag iban pa nga lugar nga masami ginatiniran sang lain-lain nga mga tawo.
Suno kay Jardeleza, dapat tun-an ang pagbutang sang HEPA filter ukon High Efficiency Particulate Air filter, isa ka portable air purifier nga maka-sala sang 99.97% sang particulates nga may kagamayon nga 0.3 microns.
Suno pa kay Jardeleza, maathag nga indi handa ang mga eskwelahan kag mga establisemento sa pag-abot sang COVID-19 pandemic apang importante gid ang mga pagpaninguha kaangay sang pagbutang sang mga filters agud malikawan ang posible nga transmission.
SA VIRTUAL NGA EDUKASYON
Sa bahin naman sang edukasyon, pabor si Jardeleza nga padayunon ang pagtuon sang mga estudyante sa virtual nga paagi sa baylo nga face-to-face.
Suno kay Jardeleza, nagatrabaho man siya sa isa ka unibersidad sa syudad sang Iloilo kag santo sa iya naobserbahan, ang digitalization ang isa ka paagi agud mas makapangita sang dugang nga inisyatibo agud makatuon ang mga manunudlo kag mga bumulutho.
Ang ginalantaw lang nga hangkat suno sa natungdan amo ang pagpatigayon sang hands-on exercises sa mga laboratory kun sa diin nagakinahaglan gid sang physical distancing kag amo man ang pagtambong sa mga art classes kun sa diin kinahanglan nga magkit-anay ang mga estudyante agud maobserbahan ang kinaiya sang kada isa.
