Nalutos ang Philippine Azkals sa ulihi sini nga hampang sa Asean Football Federation Cup.
Nagtakop ang hampang pabor sa Indonesia, 2-1, matapos ang skor nanday Dendy Sulistyawan kag Marselino Ferdinan sa ika-20 kag ika-42 nga minuto sang match sa group stage.
Nabuhian man kuntani sang paglaum ang Pilipinas sang naka-goal si Sebastian Rasmussen sa ika-83 nga minuto apang wala na ini nadugangan rason nga nagpangibabaw ang Indonesians.
Ini ang katapusan nga hampang sang team captain nga si Stephan Schrock para sa Azkals, bangud antes pa man ang hampang, nag-anunsyo na ini nga maga-retiro siya sa football.
Sa kabug-usan nga tournament, nagpang-apat ang Pilipinas sa Group A mapos isa ka bes lang nga nagdaog (batok sa Brunei) kag tatlo ka beses nga nalutos (batok sa Thailand, Cambodia, kag Indonesia).
Wala naman napunggan sang football fans sa Rizal Memorial Stadium nga ipabutyag ang ila nga disappointment sa resulta sang hampang. Sa second half pa lang sang hampang, may mga nagbayaw na sang sign nga nagapanawagan sa Philippine Football Federation nga i-improve man ang on-field play. Nakabutang sa sign ang,”Put some F***** Fight.”
Thailand kag Indonesia ang maga-abanse sa knockout semis sang tournament matapos pareho nga naka-record sang 10 points (sa top spot ang Thailand bangud sa superior goal difference).
Ini ang ika-siyam nga tion sa 13 ka appearances nga nakakas ang Pilipinas sa group stage sang nasambit nga regional biennial tournament.
Ini man ang ikaduha nga sunod-sunod nga edition nga napaslawan ang team nga makasulod sa semifinal round. ##
