ILOILO CITY- Ginkasugtan na sang Iloilo City Government kag Iloilo Provincial Government ang pagpasulod sa syudad sang Iloilo sang mga Public Utility Jeepneys(PUJs) nga nagahalin sa mga first towns nga amo ang Oton, Leganes, kag Pavia sa idalom sang amended Local Public Transport Route Plan (LPTRP) sang syudad.
Sa interview sang Bombo Radyo kay Mr. Mario Nillos, head sang Provincial Planning and Development Office (PPDO), iya ginpahayag nga sa pagpakighinun-anon nga ginpatigayon sa Iloilo Provincial Capitol kahapon, ginhatagan sang konsiderasyon ang madamo nga mga pumuluyo kag mga empleyado nga nagatrabaho sa syudad kag nagapauli sa mga first towns.
Suno kay Nillos, may yara sang patigayunon nga route alignment agud masiguro nga mag-complement ang ruta sang mga provincial PUJs sa ruta sang mga jeep sa syudad.
Pahayag ni Nillos, istoryahan man kun pila ang units sang PUJ nga pasudlon sa syudad halin sa first towns sa diin mangin basehan ang volume sang mga pasahero nga nagapadulong sa syudad.
Dugang ni Nillos, bangud nga pareho nagpasugot ang city kag provincial governments sa amo nga sistema, mas mangin mahapos kag madasig para sa Department of Transportation nga aprubahan ang LPTRP sang probinsya.
Sa bahin sang Iloilo City Government, ginpahayag ni Mr. Jeck Conlu, pinuno sang Public Safety and Transportation Management Office (PSTMO), nga i-consolidate sang syudad ang mga amendments nga nagalakip sang pagpahanugot sang first town jeepneys nga makasulod sa syudad.
Suno kay Conlu, sunod nga i-presentar ini sang technical working group sa Transport Summit nga patigayunon naman sa Agosto 30.
Ginalantaw nga sa una ukon ikaduha nga semana sang Septyembre, mapasa na ang revised LPTRP sa DOTr, kag amo sunod ang igabalik sa konseho.
Nahibaluan nga suspended subong ang implementasyon sang LTPRP sa syudad bangud sang wala-tuo nga reklamo sang riding public, drivers, kag iban pa nga apektado nga sektor sang ginlain na ang mga ruta.
