Flower vendors, makabalik na sa ila kinaandan nga pwesto para sa nagahilapit nga tigkalalag

ILOILO CITY- Makabalik na sa ila kinaandan nga pwesto ang mga manugbaligya sang bulak para sa nagahilapit nga tigkalalag.

Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office, iya ginpahayag nga ang mga designated nga lugar nga mahimo plastaran sang flower vendors umpisa Oktubre 29 tubtob Nobyembre 1 amo ang masunod: Rizal Street kag Osmena Street sa Arevalo; M.H. del Pilar Street sa Molo;Oñate Street sa hilera sang Mandurriao Public Market sa Mandurriao; Iznart Street, Aldeguer Street kag Rizal Street sa Iloilo City Proper; kag corner E. Lopez Street tubtob Luna Street sa Jaro.

Suno kay Conlu, kinahanglan nga magkuha gid sang special permit ang mga flower vendors kag mahimo nila ini i-proseso humalin Oktubre 20 tubtob Oktubre 28.

Kinahanglan nila nga magpakita sang valid identification card, vaccination card kag community tax certificate, mag-attend sang orientation kag may yara sang balayran nga P200 para sa special permit.

Kinahanglan man nga may ibutang nga signage nga no-smoking sa kada pwesto.

Gin-athag man ni Conlu nga wala na sang iban nga balayran magluwas sa P200.