Ginpatigayon ang hublag protesta sa pila ka mga syudad sa Indonesia bangud sang wildfires nga wala gihapon napalong kag toxic haze nga nagtuga na sang madamo nga balatian sa amo nga nasyon.
Nagpanguna ang mga estudyante sa mga demonstrasyon agud ipabutyag ang ila pagkadismaya sa administrasyon ni Presidente Prabowo Subianto.
Natigayon ang mga demonstrasyon sa kapital nga Jakarta, kag sa mga siyudad sang Bandung, Yogyakarta, Pekanbaru kag Makassar.
Madamo sa mga nagprotesta ang nagpuntariya sa kapaslawan sang gobyerno nga mapalong ang mga sunog nga naghalit sang malapad nga mga lugar sa mga isla sang Borneo kag Sumatra halin sang Hulyo.
Samtang, ginpahayag sang National Disaster Mitigation Agency nga kapin sa 60,000 ka bombero, lakip ang mga volunteer, ang ginpalapta sa bug-os nga pungsod agud magpalong sang mga kalayo.
May yara man sang 49 ka eroplano nga mahimo gamiton sa water bombing kag cloud seeding ukon pagpatuman sang operasyon para sa pag-ulan, apang, may mga eroplano nga temporaryo nga indi makalupad bangud sa madamol nga haze.
Suno sa wildfire monitor nga Nusantara Atlas, kapin sa 1.9 milyones ka ektarya sang duta sa Indonesia ang nasunog sa una nga siyam ka bulan sang 2026.
Nagpalala man ang mga sunog sang polusyon sa hangin sa mga kaiping nga lugar, lakip ang Kuala Lumpur sa Malaysia kag Singapore.
Kada tag-ilinit nagakatabo ang mga sunog sa Indonesia, apang mas mabaskog ang mga sunog subong nga tuig, nga ginapatihan nga may kaangtanan sa mabaskog nga El Niño weather phenomenon.#
