Ginpahalin na bilang pari ang anay Belgian bishop nga nag-ako nga sekswal sini nga gin-abusuhan ang iya duha ka mga hinablos.
Ini amo si Roger Vangheluwe, 87, nga una na nga naka-resign bilang Bishop of Bruges sang 2010 matapos nga nag-ako nga gin-abusuhan niya ang iya hinablos sa sulod sang 13 ka tuig.
Sunod man sini nga gin-ako ang pag-abuso sa isa pa gid ka hinablos apang wala niya ginakonsiderar ang iya kaugalingon nga isa ka pedophile.
Una na nga gin-insister sang Belgian prosecutors nga indi na pagkasuhan si Vangheluwe bangud madugay na nga natabo ang insidente, apang nagpanindugan naman ang justice minister nga dapat nga magdagdag ang Vatican sang penalidad.
Sa update sang Belgian Catholic Church, ginpahayag nga ginkakas ni Pope Francis ang clerical status sang former bishop. Ginkabig naman ini ni Prime Minister Alexander De Croo nga husto nga tikang agud mahatagan sang hustisya ang mga biktima.
Una na nga ginsiling sang Belgian Church nga sulit-sulit ang hingyo sang mga obispo nga pahalinon na si Vangheluwe bangud sa kahuy-anan nga iya ginhimo apang sa sulod sang malawig nga panahon, nagpabilin ini nga isa ka bishop kag pari apang napaidalom lang sa hugot nga limitasyon.
(Roger Vangheluwe, bishop of Bruges, pictured in November 2006. Photograph: Reuters)
