Ginpanginwala ni Former Buenavista, Guimaras Mayor Eugene Reyes nga siya ang rason kon ngaa nagmahal ang mga services sa Buenavista Wharf.
Sa interview sang Bombo Radyo kay Reyes, iya ginpahayag nga sa siyam ka tuig niya nga pagpangalagad bilang alkalde sang nasambit nga banwa, wala nagsulod sa iya paminsaron nga i-turnover ang wharf sa Philippine Ports Authority.
Suno pa sa iya, na-turnover ang pantalan sa tyempo karon ni Mayor Samuel Gumarin, tatlo ka bulan sang nagsugod ini pungko bilang alkalde sang 2022.
Dugang pa ni Reyes nga nagpasar sang resolusyon ang Sangguniang Bayan sang Buenavista paagi kay Vice Mayor Cyril Beltran agud i-turnover sa Philippine Ports Authority ang pantalan.
Ini man ang nangin rason kon ngaa nagtaas ang mga pagpanukot sa mga nagasulod sa pantalan.
Gin-athag man sini nga isa ini karon sa mga gina-ugtom sang mga Taga-Buenavista ilabi na sa mga nagagamit sang wharf.
