Nagakadulaan ka na bala sang gana sa imo weight loss journey? May panugyan si Philippine National Police (PNP) chief Gen. Debold Sinas para sa imo.
Anum ka bulan matapos gin-umpisahan ang strict diet kag exercise, kapin 55 pounds ang nabuhin sa bug-at sang PNP Chief.
Ini ang proud nga ginpakigbahin ni Sinas sa iya pagbisita sa Iloilo kadungan sang pagtambong sa closing ceremony sang Akap Kapatid program sang Regional Task Force to End Local Communist Armed Conflict ukon RTF-ELCAC.
Suno kay Sinas, sa sulod sang anum ka bulan, wala siya nagpalya sa konsultasyon sa iya nga doktor kag pagsunod sa husto nga diet.
Halin sa 300 pounds, 247 na lang subong ang bug-at ni Sinas apang target gid niya ang 215 tubtob 220 pounds nga bug-at.
Sang Marso 4 nga amo ang observance sang World Obesity Day, ginlunsar man ni Sinas ang Chubby Anonymous Project.
Sa idalom sang amo nga proyekto, ang mga police personnel ang magapaidalom sa intensive weight loss program kaupod ang fitness coaches.Matandaan nga Nobyembre sang nagligad nga tuig sang nagpahayag si Sinas nga i-resume sang PNP ang strict monitoring sang body mass index (BMI) sang police officers.
