“Gahalin-halin ko sang ginaistaran ko. Actually, wala gid ko kabalo kun sa diin gid man ako maistar. Pero syempre bilang bata, naandan ko na man lang nga kun diin ako makalab-ot, dira ako ma-adjust.”
Ini ang paglaragway ni Russel Sky Parreño, 29, sa iya nagligad —- nagalihu-liho, wala sang permanente nga puluy-an, nagasulod sa mga karinderya kag nagahulat sang kaluoy sang iban nga mga kustomer.
Sa lamharon nga edad, natun-an ni Russel nga sauluhon ang mga dalanon sa syudad sang Iloilo. Ini nga mga alagyan ang nangin saksi sang iya pagkabata kag kun paano natukod ang iya nga mga handum sa kabuhi nga sang una wala niya nahibal-an kun paano niya tumanon.
Makaligad ang halos duha ka dekada, nagbalik siya sa amo nga dalanon sa syudad — indi bilang isa ka tawo nga nagapangayo-ngayo, kundi bilang isa ka social worker nga may tagipusuon sa pagbulig sa mga kabataan.
“IT TAKES A VILLAGE TO RAISE A CHILD”
Sa exclusive interview sang Bombo Radyo kay Russel, iya ginpakigbahin nga natun-an na niya ang tanan nga diskarte agud lamang nga mabuhi sang siya ang bata pa.
Matapos ang malawig nga tinuig sang pagtinir niya sa mga dalan, gindala siya sang iya lola sa Guimaras kag didto niya natun-an ang pagpangahoy kag pagpanguma. Apisar tuman ka pigado, wala nadula sa isip ni Russel ang edukasyon: “Ang balon ko duha ka piso. Ang isa ka piso, ginabakal ko sang tag-piso nga ginamos; ang piso naman nga isa, ginabakal ko sang saging para sa pamahaw. Adlaw adlaw gid ina.”
Wala man ini nakapugong sa iya nga makatapos sa elementarya bilang second honors: “Ang hambal ko gani, indi ninyo pag-i-underestimate ang mga streetchildren. Mga smart man kami pro,” lahog pa ni Russel.
Sang high school na, nagbalik si Russel sa Barangay San Antonio, Molo kag diri na ginpadayon ang iya nga pag-eskwela.
“Gapangita man ko sang grupo kay para mafeel ko ang acceptance and belongingness para somehow daw may thrill,” pahayag ni Russel. “Gapangawat kami. Nagkadto kami sa computeran. Ginkuot namon ang kwarta kag gintulunga namon.”
Ini na suno sa iya ang iya nga nangin habit… lipod sa ihibalo sang iya nga gina-istaran. Apang wala sang sekreto nga indi mabulgar. Nadakpan si Russel sa iya nga ginapanghimo.
“Feeling ko tanan nga tawo gatulok sa akon. Daw wala may gaprotect sa akon kag daw wala gid ko sang balikdon. Daw nag-umpisa na ko nga mangakig sa iban nga tawo,” dugang pa ni Russel.
Sang second year high school na si Russel, may yara sang faith-based organization nga nagbisita sa ila eskwelahan, kag wala niya gindumdom nga ini ang iya mangin “turning point kag breakthrough.”
Ang una niya nga tuyo sa pagsulod sa grupo amo nga ma-avail ang P10 nga allowance kada adlaw kag ang oatmeal, apang sa wala niya ginalauman, diri niya nakit-an ang mga tawo nga naghatag sa iya sang dugang nga inspirasyon agud maghandum.
Isa man siya sa nagtudlo sa mga kabataan sa dalan kag nakatuon sang bag-o nga mga hilig kaupod ang mga tawo nga may propesyon na. “Dira ko nag-umpisa nga magdream liwat.”
Mga “manggaranon” ang iya mga kaupod bangud suno sa iya, madamo sila sang tinaga nga amo ang naghatag sa iya sang inspirasyon.
Nagtinguha si Russel nga maka-eskwela sa English Language Proficiency paagi sa Technical Education and Skills Development Authority (TESDA).
Matapos sini, nagtinguha pa gid siya nga makaeskwela sa kolehiyo kag ginkuha ang kurso nga Bachelor of Science in Social Work — isa ka four-year degree program nga designed para sa social work practice, social welfare policies, kag human welfare.
Handum kag dumot gid ni Russel nga makatrabaho sa Department of Social Welfare and Development, gani matapos nga nakapasar sa exam, nag-apply siya gilayon.
Wala siya ginpalad sa una nga kahigayunan apang wala niya ginbuy-an ini nga handum. Matapos ang isa ka tuig kag tunga nga pagtrabaho sa isa ka pribado nga ospital sa syudad, nag-apply siya liwat sa DSWD sa idalom sang programa nga “Comprehensive Program for Streetchildren.”
Subong, si Russel ang isa na ka social worker nga assigned sa DSWD Field Office VI.
Sentro sang iya nga trabaho ang pag-follow up sa mga local government units may kaangtanan sa ila nga mga streetchildren kag kun paano sila matatapan.
“I AM STILL OVERWHELMED”
Indi pa gihapon makapati si Russel sa tion nga mabalikan niya ang lugar kun sa diin siya una nga naglihu-liho.
“Ang una-una ko gid nga nabatyagan, I am overwhelmed. Makahambal gid ko nga, “ay ari na ko di gali?”
Nagapati si Russel nga ang iya istorya isa lamang sa madamo pa nga istorya sang mga bata nga yara subong sa dalan.
“All we need siguro is ang paghatag sang care, ihatag ang support sa palibot kag ihatag ang pagpati nga masarangan nila kag may mahimo sila sa ila nga kabuhi.. updan naton ang mga bata asta nga malab-ot nila ang ila nga mga handum.”
