Ginalauman nga makatipon si anay US President Donald Trump sang masobra $40 million ukon P2.26-billion subong nga adlaw nga amo ang makaguba sang brand-new fundraising record nga gin-set nanday President Joe Biden sang nagligad lamang nga semana.
Subong nga gab-i oras sa Palm Beach, Florida natalana nga pabahaon ang kuwarta nga para sa 2024 presidential race cash dash.
Tuyo ni Trump nga malapawan ang $26 million ukon ang P1.47-billion nga natipon ni Biden sa fundraising appearance sang Marso 28 sa Radio City Music Hall sa New York City kun sa diin yara sanday former Presidents Barack Obama kag Bill Clinton.
Gintawag anay sang kampo ni Biden nga “historic” ang ila natipon nga balor sa amo nga star-studded event.
Inoras antes pa ang fundraiser ni Trump subong nga adlaw, gin-anunsyo man sang Biden campaign nga masobra $187 million ukon P10.58-billion ang ila natipon sa una nga tatlo ka bulan subong nga tuig.
Apang sa event ni Trump sa Florida, magatipon man ang masobra 100 ka guests lakip ang pila ka bilyonaryo kun sa diin ang billionaire investor kag hedge fund founder nga si John Paulson ang host sa top-dollar fundraiser nga amo ang kickoff event para sa bag-o lang natukod nga Donald J. Trump National Committee.
Ang mga kontribusyon sa sini nga event ang magakadto sa Trump 47 Committee, isa ka joint fundraising agreement sa Republican National Committee, state Republican parties kag Save America, isa ka political action committee nga amo ang nagabayad sa kadam-an sang legal bills sang anay presidente.#
AFP; Getty Images via NBC News
