ILOILO CITY – Nagsabat si anay Department of Health (DOH) Secretary kag subong Iloilo 1st District Rep. Janette Garin sa akusasyon ni Presidential Spokesperson Atty. Harry Roque nga mas mahal pa ang mga personal protective equipment (PPE) nga ginbakal sa idalom sang Aquino Administration kun ipaanggid sa mga ginbakal sang Duterte administration.
Nahibaluan nga si Garin ang nagserbe nga tiglikom sang DOH sang si the late President Benigno Aquino III pa ang nagapungko sa pwesto.
Sa exclusive interview sang Bombo Radyo Iloilo kay Garin, iya ginpahayag nga sang naglapta ang Ebola virus kag ang Middle East respiratory syndrome- coronavirus (MERS-CoV), gamay pa lang ang mga nagahimo sang PPE.
“Nag-start man lang gid ya pag COVID na. Although after sang MERS-CoV may nagatuhaw naman nga kumpanya. It’s not comparable sa 3M set I was told. Very clear man nga indi ako involve.”
Nahibaluan nga ginpanginwala ni Roque nga overpriced ang ginbakal nga mga PPE para sa mga health workers sa idalom sang Duterte administration sa balor nga P1,700 kada isa sa tunga-tunga sang pandemya sang 2020 nga sa subong sentro sang paggisa sang Kongreso.
“Overpriced ba raw po ito? Hindi po. Kasi yung mga panahon na yun, biglang lahat ng bansa ay naghahanap ng PPEs,” pahayag ni Roque.
“Sa katanuyan, pruweba na hindi po ito overpriced, magkano ba ang binili, magkano yung presyo ng PPE na binili ng Aquino administration? P3,500. Kailan? September 28, 2015. Matter of days bago bumaba sa puwesto ang Aquino administration, magkano binili na PPE? P3,800, June 23, 2016,” dugang pa sang tiglikom.
Suno kay Garin, kung nagaduda si Roque sa procurement sang Aquino Administration, mahimo niya nga pasakaan sang kaso ang supplier nga suno sa anay tiglikom lunsay man mga lehitimo nga negosyante.
“Kun gusto ni Sec. Roque, pwede na nila pasakaan kaso ang supplier for overpricing. Supplier can also justify kun gin-overpriced ya gid man. Nag-abuso bala sila ti sila ang supplier. Total puro man na legitimate ang supplier.”
Paathag ni Garin, indi mahimo nga ikumpara ni Roque ang presyo sang PPE sadto kag sa subong nga administrasyon bangud lain ang sitwasyon subong nga madamo na sang nagabaligya sang PPE sa barato nga presyo.
“Indi mo pwede makumpara ang apples and oranges. Magkaiba ang quality tam-an kalayo kag iba ang technical specifications. Ang very important pa gid is magkaiba ang quantity. During that time iba-iba ang klase sang PPE.”
