Posible pa sa gihapon nga magsaka sang 3.8% ang ekonomiya sang Pilipinas subong nga 2026, suno sa Asian Development Bank (ADB).
Apang, pahayag sang banko, kinahanglan magbalik ang daku nga paggasto sang gobyerno, ilabi na sa mga proyekto sa imprastraktura.
Sa datos sang Department of Budget and Management (DBM), nag-abot lang sa P98 billion ang gasto sang gobyerno sa imprastraktura sang Hunyo, mas manubo sa P148 billion sang amo man nga bulan sang nagligad nga tuig.
Sa unang anum ka bulan sang 2026, 40.76 porsyento nga mas manubo ang infrastructure spending kumpara sa amo man nga tion sang 2025.
Naghinay man ang ekonomiya halin sa 2.8 porsyento sa unang quarter pakadto sa 2.3 porsyento sa ikaduha nga quarter, bangod sa paghinay sang paggasto kag mataas nga presyo sang mga balaklon.
Suno sa ADB, mahimo mag-uswag pa ang ekonomiya sa 5.8 porsyento sa 2027 kon magbalik ang normal nga paggasto sang gobyerno kag magnubo ang inflation.
