Ginpasalig ni House Speaker kag Leyte Representative Martin Romualdez nga imbestigaran sa Kamara ang gina-alegar nga “gentleman’s agreement” nga ginsudlan ni anay President Rodrigo Duterte kag sang China kun sa diin nakasaad nga indi mahimo makadala ang Pilipinas sang construction materials para kay-uhon ang daan nga barko nga BRP Sierra Madre sa Ayungin Shoal.
Ang nasambit nga kasugtanan amo ang ginapakigbato sang China kag ginahimo nga justification sa ila pagpang-atake kag pagbomba sang tubig sa mga barko sang Pilipinas nga may misyon sa Ayungin.
Suno kay Romualdez, iga-assign ini sa nagakaigu nga committee para matigayon ang inquiry — in aid of legislation — agud nga matumod ang impact sang gina-alegar nga kasugtanan sa national nga interes sang Pilipinas partikular sa soberanya, sovereign rights, kag territorial integrity.
Gingamit man ni Romualdez ang Article 56 sang United Nations Convention on the Law of the Sea ukon UNCLOS kun sa diin ginsiling nga ang coastal state kaangay sang Pilipinas ang may kinamatarong nga magtukod kag magkay-o sang estruktura sa sulod sang kaugalingon nga Exclusive Economic Zone (EEZ).#
