ILOILO CITY – Dako ang pagpati sang isa ka political analyst nga may kamatuoran ang huring-huring nga may plano nga kudeta si Former President kag subong Pampanga Representative Gloria Macapagal-Arroyo batok kay House Speaker Ferdinand Martin Romualdez nga amo ang pinakamataas nga lider sa Kamara.
Ini matapos nga ginkakas si Arroyo bilang Senior Deputy Speaker kag ginhimo na lamang nga Deputy Speaker sang Mayo 17.
Si Arroyo ang ginbuslan ni Pampanga 3rd District Representative Aurelio Gonzales sa Senior Deputy Speakership.
Sa interview sang Bombo Radyo kay Atty. Joenar Pueblo, Law Professor sa University of San Agustin, College of Law, iya ginpahayag nga panangitan nga nadayon gid man ang kudeta,wala nagakahulugan nga si Arroyo ang magabulos kay Romualdez.
Sa pagkamatuod suno kay Pueblo, may yara sang isa ka mamalidha nga magabulos, magluwas kay Arroyo.
Ini agud malikawan ang ano man nga sahi sang negatibo nga komento nagikan sa publiko.
Ginpahayag dugang sang natungdan nga may ginasundan nga ‘playbook’ si Arroyo kaupod si Vice President Sara Duterte matapos nakit-an nga magkaupod sang Mayo 19 isa ka adlaw matapos ang demotion ni Arroyo kag resignation ni Duterte sa iya political party nga Lakas-Christian Muslim Democrats nga may panalabiton nga political “toxicity” kag “powerplay.”
Ginpahayag naman ni Arroyo nga ang pagkakas sa iya bilang Senior Deputy Speaker ang isa lamang ka kinamatarong ukon ‘prerogative’ sang kamara.
Posible suno kay Pueblo nga nagadihon ang duha (Arroyo kag Duterte) sang pasimple nga tikang sa amat-amat nga pagtukod sang isa ka political relationship bilang preparasyon sa masunod nga presidential elections.
Kilala sanday Arroyo kag Duterte bilang suod nga mag-abyan kun sa diin gin-endorso ni Arroyo ang Marcos-Duterte tandem sa 2022 polls.
