ILOILO- Naistoryahan na sang Iloilo Provincial Government kag sang Department of Pulbic Works and Highways ang problema sa indi pagpahamtang sang mga road signages kag early warning devices sang mga kontraktor sang mga ginaconstruct nga proyekto sa probinsya.
Sa interview sang Bombo Radyo kay Iloilo Governor Arthur Defensor Jr., iya ginpahayag nga sa pagsinapol nga gintambungan ni Department of Pulbic Works and Highways Region 6 Director Lea Delfinado kag mga district engineers, iya ginpahayag nga ila nakasugtan nga striktuhan ang pag-enforce sang mga kontrata sa tunga sang ahendya kag mga kontraktor.
Suno kay Governor Defensor, ila hugot nga ipahanumdom sa mga kontraktor ang pagbutang sang signages kag safety devices sa mga dalanon.
Iya ginpahayag nga maathag nga nabutang sa mga kontrata nga katungdanan sang mga kontraktor nga malikaw ang mga motorista sa aksidente nga matuga sang ila kapaslawan nga magbutang sang early warning devices kag signages.
Dugang pa sang gobernador, magapatigayon man sila sang regular nga inspection sa mga proyekto sa probinsya agud ma-monitor ang development sang mga construction projects.
Samtang, gin-ako naman ni Governor Defensor nga mahinay ang pagconstruct sang gym sang banwa sang Janiuay.
Suno kay Defensor, ginapahanumdom niya sa kontraktor nga padasigon na man ang pagkompleto.
Nagpaandam man ang gobernador sa mga kontraktor nga indi pag-idelay ang mga proyekto bangud magapangatubang ang mga ini sang penalidad kag magabayad sang damages kun mapaslawan nga masunod ang nasaad sa kontrata.
