ILOILO CITY- Gin- athag ni Iloilo Governor Arthur Defensor Jr. nga wala sang kahilabtanan ang ginbati- bati powerplay sa tunga nanday Rep. Julienne Baronda kag Raisa Treñas- Chu ang pag-postpone sang oath taking sang mga local official nga magaupod sa Partido Federal ng Pilipinas.
Una nga gintalana ang oath taking sa Abril 10, Mierkules, sa Iloilo City.
Ang Partido Federal ng Pilipinas amo nga partido ni Presidente Ferdinand Marcos Jr.
Sa interview sang Bombo Radyo kay Defensor nga nagaserbe nga regional head sang partido, iya ginpahayag nga ang rason sang postponement amo ang pagpadulong ni Presidente Marcos sa Estados Unidos kun sa diin kaupod man niya ang iban nga opisyal sang partido kaangay ni Special Assistant to the President Anton Lagdameo Jr. samtang si Ilocos Norte Rep. Sandro Marcos naman ang may nauna na nga commitments.
Suno kay Defensor, pakamaayuhon gid sang partido nga yara ang presensya sang mga top officials sa tion sang oath- taking ilabi na si South Cotabato Governor Reynaldo Tamayo Jr.nga amo ang presidente sang partido.
Pahayag sang gobernador, sa subong, wala pa sang pinal nga petsa kun san- o hiwaton ang oath taking apang wala man ini ginadalian.
Sa Iloilo, ginalauman nga indi magnubo sa 20 ka mga incumbent mayors ang magaupod sa partido.
Nahibaluan nga una na ginpangabay ni Iloilo City Mayor Treñas nga paupdon sa partido ang iya anak nga si Raisa Treñas Chu nga magapadalagan sa pagka- kongresista kontra kay Baronda.
Naggwa naman ang huring- huring nga nakapalapit si Baronda sa Malacañang kag nakapanugid kay First Lady Lisa Araneta- Marcos nga ginadis-og ini sa syudad kag si Trenas- Chu ang pasumpaon sa partido kag suportahan sang administrasyon.
