ILOILO CITY- Makabulig sang dako sa connectivity sa rehiyon 6 ang tukuron nga Panay- Guimaras- Negros Bridge amo man ang Iloilo-Capiz-Aklan expressway.
Ini ang pagpati ni Governor Arthur Defensor Jr. may kaangtanan sa paghatag ni Presidente Ferdinand Marcos Jr. sang prayoridad sa pagtukod sang amo nga taytay nga iya pa gani ini ginmitlang sa iya State of the Nation Address.
Sa interview sang Bombo Radyo kay Governor Arthur Defensor Jr., iya ginpahayag nga makabenepisyo gid diri ang minilyon nga mga pumuluyo kag dako ang mangin kontribusyon sang ini nga mga struktura sa pagsanyog sang ekonomiya.
Suno kay Defensor, apisar wala namensyonar ni Marcos ang expressway sa Panay, automatic na nga nalakip ini prayoridad bangud nga kaupod ini sang Panay- Guimaras- Negros Bridge.
Nahibaluan nga gintawag ni Defensor nga game-changer ang proposed Iloilo-Capiz-Aklan Expressway (ICAEx) bangud dako ang tungdan sini nga papel sa “MoReProGRes” (Movement for Resurgent, Progressive, Globally Competitive and Resilient) nga direksyon sang iya administrasyon para sa 2022-2025.
