ILOILO CITY- Nagpatawag si Iloilo Governor Arthur Defensor Jr. sang emergency meeting subong nga adlaw, Enero 4, 2024, las-9 sa aga, kaupod ang Department of Energy, National Grid Corporation of the Philippines, mga distribution utilities kag cooperatives agud maistoryahan ang lapnagon nga power outage sa Western Visayas.
Sa interview sang Bombo Radyo kay Gov. Defensor, iya ginpahayag nga ang emergency meeting ang may katuyuan nga ma-address ang power crisis kag balikan ang mga direktiba nga ginpapanaog sang Department of Energy sang nagligad nga tuig.
Kun matandaan, naka-eksperyensya man ang Iloilo sang pila ka adlaw nga wala sang kuryente sang nagligad nga tuig.
Halimbawa sa direktiba suno kay Gov. Defensor amo ang pagpadasig sang pagpahuman sang backbone sang national grid, ang Cebu-Negros Occidental-Panay backbone.
Yara man sa amo nga emergency meeting si Iloilo City Mayor Jerry Treñas.
Pahayag sang gobernador, sa iya nga pagpakig-istorya sa tiglikom sang Department of Energy, ginpasiguro sa iya nga yara na sa atensyon sang ahensya ang problema sa kuryente sa Panay.
