Nagpaguwa sang official statements ang nagkalain-lain nga ahensya sang gobyerno agud manindugan nga patalang kag binutig ang pahayag sang China nga nagsulod ang Pilipinas sa ginaalegar nga “new model” agreement sa China kaangot sa isyu sa Ayungin Shoal.
Nagatumod ini sa pahayag sang Chinese Embassy in Manila sang Sabado nga ang Armed Forces of the Philippines (AFP) Western Command ang nagsulod sa gina-alegar nga “new model” nga kasugtanan sa temprano nga bahin subong nga tuig.
Gin-alegar man sang embahada nga ang statement ang aprubado sang tanan nga key officials sa chain of command sa Pilipinas lakip na ang tiglikom sang National Defense kag National Security Adviser.
Pahayag naman sang Department of Foreign Affairs (DFA), wala ini sang ihibalo sa ginawaragwag sang Chinese embassy nga may yara sang new model arrangement.
Sa liwat suno sa ahensya, wala sang agreement nga ginsudlan ang Pilipinas nga naga-abandonar sang soberanya sang pungsod kag sa hurisdiksyon sini sa exclusive economic zone kag continental shelf lakip na sa Ayungin Shoal.
“The DEA reiterates its firm position that the Philippines has not entered into any agreement abandoning its sovereign rights and jurisdiction over its exclusive economic zone and continental shelf, including on the Ayungin Shoal,” kabahin sang statement.
Ginsiling man sini nga ang pagpanginwala sang Department of National Defense (DND) kag National Security Council (NSC) nga may natabo nga informal arrangements sa Ayungin Shoal ang nagapamatuod nga lunsay butig ang mga naratibo sang China.
Naghingyo man ang Pilipinas nga likawan man ang pagpalapta sang sala nga impormasyon batok sa Philippine officials bangud ginapalibog sini ang ulo sang publiko kag gina-distract sa matuod nga isyu nga amo ang iligal kag agresibo nga mga pagpang-atake sa West Philippine Sea.
Sa statement naman ni National Security Adviser Secretary Eduardo Año, ginsiling sini nga wala sang may gin-authorize si President Ferdinand “Bongbong” Marcos Jr. nga mag-komiter sa anuman nga kasugtanan ukon arrangement ilabi na ang mga indi man pormal.
Suno kay Año, makaisa ka bes lang nga may courtesy call ang Chinese ambassador sa iya opisina sang nagligad nga tuig kag pagkatapos sini, wala na siya sang naistorya nga bisan isa ka opisyal sa Chinese embassy sa direkta ukon indi direkta man nga paagi, kag wala man sang nadiskusyunan sa routinary resupply operations sa Ayungin Shoal.
Pahayag pa sang National Security Adviser, indi ini mag-entertain sang mga proposals nga nakabangko sa illegal, debunked, kag fabricated “9 or 10 dash line.”
“The Chinese Embassy should be reminded that they can never deceive the Filipino people with their fabricated stories, bluffs, and fake exchanges of communication just to support their illegal claim of Philippine territory, as well as to justify their illegal, coercive, aggressive, and deceptive actions, particularly the use of military-grade lasers, water cannons, dangerous blocking maneuvers, and ramming of our vessels which has caused wounded casualties on our side,” pahayag sini.
Nagsabat pa si Año nga naghimo ang Chinese Embassy sang media chat group agud mag-manipular sang impormasyon.
Sa sini nga “group chats”, sa baylo nga journalists ang mamangkot, ang embahada suno sa iya ang nagapost sang leading questions kag sila man ang nagasabat rason nga ang ma-broadcast nga mga impormasyon amo man ang himu-himo nga mga istorya.
Ini nga istorya kag mga alegasyon sang China suno kay Año ang nagatuyo man nga i-distract sa publiko sa matuod nga istorya nga nagakalapatay na ang corals sa Pag-Asa Cays 1, 2, 3 nga amo ang man-made geologic feature sa tunga sang Pagasa Island kag Subi reef.
Ini nga “arrangement story” ang fake news kag disinformation suno kay Año kag ini na ang katapusan nga tion nga magakomento siya sa sini nga isyu.
Mabaskog man nga statement ang ginbuy-an ni Defense Secretary Gilbert Teodoro Jr. kun sa diin ginpanginwala sini nga involved man ang Department of National Defense sa agreement nga ginawakal sang China.
“I would like to clearly state that any insinuation that the Department of National Defense is a party to any ‘new model’ is a devious machination of China through their Embassy in Manila, and, curiously, it comes right after their actions were condemned in the recent SQUAD meeting in Honolulu, Hawaii,” pahayag sini.
Ang claim sang China suno kay Teodoro ang maathag nga isa ka attempt agud nga magpalapta na naman sang sala kag tungaon ang mga Pilipino kag i-distract sa ila presensya kag iligal nga aktwasyon sa exclusive economic zone sang Pilipinas. #
