Patigayunon sa Passi City arena ang pagbalik sang All-Star Weekend sang Philippine Basketball Association sa bulan sang Marso.
Ini ang una nga tion halin sang 2019 nga ginbalik All-Star festivities.
Katapusan ini nga ginhiwat sa Calasiao, Pangasinan sang Marso sang amo nga tuig kun sa diin nagpangibabaw ang North All-Stars samtang sanday Japeth Aguilar sang Barangay Ginebra kag Arwind Santos naman sang San Miguel ang ginkilala nga Most Valuable Players.
Suno kay PBA commissioner Willie Marcial, sa pagbalik sang event sa Marso 9-12, sa baylo nga traditional North vs. South All-Stars format, sundon na sang liga ang set-up sang NBA kun sa diin ang leading vote-getters ang maga-draft sang ila nga teammates para sa hampang.
Ang fans man mismo ang makapili sang coaches para sa duha ka All-Star teams.
Enero 25 natalana nga buksan ang fan balloting system pareho para sa online kag in game venues. Mahimo makaboto ang fans tubtub sa Pebrero 15 paagi sa website sang PBA kag sa ila official social media platforms.
Suno pa kay Marcial, may yara man sang rookies-sophomores-juniors game kun sa diin ang kada team ang maga-feature sang duha ka first-year players.
Mahimo man i-feature sa hampang ang celebrities suno sa commissioner.
May yara man sang blitz challenge, three-point shootout, kag slam dunk contest.
Nagaplano man ang liga sang 3×3 competition nga amo naman ang maga-feature sang local basketball stars sang syudad sang Passi.
Madumduman nga 2020 pa sang nahatag sang PBA sa Passi City ang PBA All-Star hosting rights. Naka-host naman ang amo nga syudad sang PBA Governors Cup showdown sang 2018 kun sa diin daog ang Talk N Text KaTropa batok sa Rain or Shine Elasto Painters. ##
