Ginluthang-patay sang isa ka Thai para-athlete nga groom ang iya kaugalingon nga bride kag ang tatlo ka iban pa nga tawo antes sini gintiro man ang iya kaugalingon kadungan mismo sang iya kasal sa northeast Thailand.
Ang suspek amo si Chaturong Suksuk, 29, samtang ang iya naman bride amo si Kanchana Pachunthuek, 44.
Suno sa inisyal nga impormasyon, nagbiya anay ang groom sa wedding party kag sang nagbalik ini, may dala na ini nga pusil kag gintiro ang iya bride, ang 62-anyos nga iloy sang bride kag ang 38-anyos nga utod sini.
Naigu man sang bala ang duha ka mga bisita sa amo nga kasal, kag sang gindala na sa ospital, isa sa ila ang napatay.
Ginpahayag nga hubog ang suspek sang amo nga tion kag may impormasyon nga nag-away sila sang bride sa tion sang party.
Antes ang kasal, tatlo ka tuig na nga mag-live in sanday Chaturong kag Kanchana.
Photo: NY Post
Nahibaluan nga silver medalist ang suspek sa swimming sa Asean Para Games sa Indonesia sang nagligad nga tuig, silver medalist man sa Cambodia, kag nadala man sa listahan sang mga para-athletes nga maga-compete sa World Abilitysport Games sa Thailand sa masunod nga bulan.
Sandig sa reports, nadulaan siya sang tuo nga tiil sa isa ka insidente samtang naga-duty ini anay sa paramilitary light infantry force nga amo ang naga-patrolya sa borders sang pungsod. #
