Kulang na gani, atrasado pa.
Ini ang paglaragway sang fisherfolk group sa ginpasalig sang gobyerno nga fuel subsidies para sa mga manugpangisda sa tunga sang nagatimbuok nga presyo sang gatong nga naga-apekto man sa ila nga operasyon kag palangabuhian.
Suno kay Fernando Hicap, national chairperson sang PAMALAKAYA, madamo pa sa ila ang wala pa gihapon nakabaton sang ayuda apisar nga manug-apat na ka semana ang gyera kag apat ka semana naman nga may nagapanglakaak nga oil price hikes.
“Yung pangako nila na tatlong libo, actually sabi nila 2025 budget pa ‘to no doon sa fuel subsidy hanggang ngayon wala pa… halos tatlong linggo na itong sumirit yung presyo ng gasolina na halos doble na yung gastos ng mangingisda kaya napakabagal at wala pa talagang natatanggap yung mga mangingisda,” suno kay Hicap.
Sa data sang gobyerno, 14,000-15,000 lamang ang covered sang ayuda, apisar nga masobra 300,000 ang rehistrado nga municipal fishers.
Bangud sang mataas nga presyo sang gatong suno sa grupo, madamo sa manugpangisda ang wala na nagakadto sa dagat bangud indi na masarangan ang operating costs.
Magluwas diri, napilitan man ang iban suno sa iya nga mag-share na lang sa sakayan, ukon duha tubtub tatlo ukon tag-lima pa gid ka tawo sa kada bangka rason nga mas gamay man ang ila nga income.
“Bago pa man tumaas ‘to… nasa 80% na ang total na gastos namin napupunta sa gasolina… kaya ngayon yung iba hindi na kayang makapangisda, nakikisama na lang sa may kapasidad,” dugang ni Hicap.
Ginasulit sang grupo ang panawagan nga dasigon man kag mangin inclusive sa pagpanagtag sang ayuda nga labi nila nga kinahanglan.#
