Ginapanawagan sang General Services Office (GSO) ang ‘social behavioral change’ sa mga barangay kag komunidad sa Iloilo City.
Ini bilang kabahin sang pagresolbar sang padayon nga problema sa basura, ilabi na sa mga waterways kag easements.
Sa interview sang Bombo Radyo kay Engineer Neil Ravena, head sang GSO, iya ginphayag nga isa lamang ka ‘palliative’ ukon temporaryo nga solusyon ang ginapatigayon nga clean-up drive sang Iloilo City Government.
Gani kinahanglan nga mangin aktibo mismo ang mga pumuluyo kag barangay sa pagmintinar sang kalimpyo.
Dapat, suno sa iya, ang barangay mismo ang nagapanguna sa pagmintinar sang kalimpyo kag husto nga pagdispose sang basura, ilabi na sa mga lugar nga malapit sa waterways kag easements.
Magadeploy naman ang GSO sang personnel para sa Information, Education and Communication (IEC) activities kag pagmonitor sa mga barangay nga nalimpyuhan na.
Nagapadayon naman sa subong ang clearing operation sa Barangay Cubay, Jaro, Iloilo City, nga ginapaabot makakuha pa sang yara sa anum tubtob walo ka truck sang basura.
Suno kay Ravena, mangin mabudlay nga masolusyunan ang problema sang basura sa waterways kung wala sang pagbag-o sa pamatasan kag aktibo nga partisipasyon sang mga pumuluyo sa husto nga pagdispose sang ila tagsa ka basura.
