GUIMARAS – Sa pihak sang naagyan nga kabudlay sa pagpangabuhi, wala ini nangin upang sa isa ka Guimarasnon agud magpangibabaw sa August 2024 Real Estate Appraisers Licensure Examination.
Ini amo si Jude Fernandez Ambid, tumandok sang Cabungahan, San Lorenzo, Guimaras, graduate sang Guimaras State University nga rank 6 sa pasinawan nakakuha sang passing rate nga 88.50%.
Sa interview sang Bombo Radyo kay Ambid, iya ginpahayag nga grade 5 pa lang ini, nailo na siya sa amay sa diin ang iya iloy na lang nga nagabaligya sang mga luto nga sud-an ang nagbuhi sa ila tatlo ka mga mag-utod.
Suno kay Ambid, matapos ang high school, wala pa ini nagderetso sa kolehiyo bangud sa kapigaduhon.
Apang nahatagan ini sang kahigayunan nga makapadayon sa pagtuon sa kolehiyo sa bulig man sang scholarship sang Hiligaynon Community sa Kuwait sa diin libre na ang iya tuition kag allowance.
Matapos nag-graduate sa kolehiyo, nagpangita na ini sang nagkalain-lain nga trabaho.
Sa subong, nagatrabaho na ini sa Local Government Unit sa San Lorenzo, Guimaras.
