Aprubado na sa third and final reading sa Senado ang hagna nga ginduso agud nga mahatagan sang cash gifts ang mga Filipinos nga makalab-ot sa edad nga 80 kag 90-anyos.
Sa idalom sang Senate Bill No. 2028 ukon ang An Act Recognizing the Octogenarians, Nonagenarians, and Centenarians, tuyo sini nga pasangkaron pa ang nauna na naestablisar nga Centenarians Act.
Photo Courtesy: Fast Voice Media
Sa idalom sini nga hagna, ang mga tigulang nga naga-edad sang 80 kag 90 anyos ang pagahatagan sang 10,000 kag P20,000.
Ang centenarians ang makabaton gihapon sang P100,000 nga cash gift kag sang letter of felicitation halin sa presidente.
Nakasaad man sa hagna nga ang octogenarians, nonagenarians, kag centenarians ang eligible nga makabaton sang cash gift sa sulod sang isa ka tuig halin sang nalab-ot ang edad nga 80, 90, kag 100.
Tanan nga Filipinos nga malab-ot sa amo nga edad — diri man sa Pilipinas naga-istar ukon yara na sa luwas sang pungsod — ang sarang makabaton sang cash gift.
Ginamanduan ang National Commission of Senior Citizens nga mag-maintain sang elderly data management system kun sa diin nakabutang ang importante nga mga impormasyon sa mga Lolo kag Lola nga sakop sang amo nga hagna. #
