Halos 40 ang patay sa Iraq kag Syria bangud sang airstrikes nga ginlunsar sang Estados Unidos sang Amerika batok sa masobra 85 ka mga target nga naangot sa Iran Revolutionary Guard kag sa mga militias nga ginasuportahan sini.
Sa Iraq, ginsiling sang Popular Mobilization Forces nga 16 sa ila nga mga myembro ang napatay lakip na ang ila nga mga hangaway kag medics.
Sa Syria, ang strikes ang nagpatay sang 23 ka mga tawo nga nagaguwardiya sang targeted locations.
Nahibaluan nga masobra tunga sa oras ang airstrikes sang Amerika sang nagligad nga gab-i gamit ang masobra 125 ka precision munitions.
Pila sa strikes ang gingamitan sang B-1B bombers nga naghalin pa sa Dyess Air Force Base sa Texas kag nagbyahe sang 6,000-miles.
Lakip sa ginpang-igu sini amo ang command kag control operation centers, intelligence centers, rockets kag missiles, unmanned aired vehicle storage warehouses, kag logistics kag munition supply chain facilities nga ginagamit sang mga militia grups nga lunsay suportado sang Iran.
Ini nga pag-atake sang US amo ang ila nga una nga pagtimalos bangud sang drone attack sa ila nga military base sa Jordan kun sa diin tatlo ka mga soldado ang patay kag masobra 40 ang pilason.
Ang amo nga aerial attack ang una na nga ginpasibangod sang Amerika sa Iran — butang nga ginpanginwala naman sang amo nga pungsod.#
