Nagpaandam ang Hamas nga pamatyon nila ang ila nga mga bihag pananglitan magliwat pa ang Israel sa pagpatigayon sang air strikes sa mga residente sa Gaza Strip.
Base ini sa statement nga ginpaguwa sang Ezzedine al-Qassem Brigades nga armed wing sang Hamas.
Suno sa statement, pananglitan mag-atake ang Israel nga wala sang warning, indi man magpang-alang-alang ang Hamas nga patyon ang isa sa mga sibilyan nga ila subong na-hostage.
Photo: REUTERS/Mohammed Salem
“The enemy doesn’t understand the language of humanity and ethics, so we’ll address them in the language that they understand,” kabahin sang ginpaguwa nga pahayag.
Nahibalauan nga ginapulbos sang Israel ang Gaza Strip sa sulod na sang tatlo ka adlaw bilang pagtimalos sang una nga nagsulod ang militante nga grupo sa nabagatnan nga bahin sang pungsod kag nagpamatay sang ginatos ka Israelis sa isa ka sorpresa nga pagpang-atake.
Ang amo nga mga militante nga Hamas nga nagpaulan sang rockets halin sa Gaza Strip ang nagbalik man sa ila nga base nga ginpahayag may dala nga masobra 100 ka hostages.
Una na nga ginpahayag sang Israeli military spokesman nga ang detalye sang 30 hostages ang nahatag na mismo sa ila tagsa ka pamilya.
Base sa rekord, masobra 700 ka Israelis ang patay kag masobra 1,200 ang nasamaran sang nag-atake ang Hamas. Sang nagbalos naman ang Israel paagi sa air strikes, ginapahayag nga masobra man sa 400 ka Palestinians ang napatay sa Gaza Strip.#
