Nagapatigayon ang Commission on Elections (COMELEC) sang polling place inspection sa syudad agud masigurado nga mangin matalunsay ang pagboto sang mga residente sa maabot nga May 9 national and local elections.
Sa interview sang Bombo Radyo kay Mr. Jonathan Sayno, Election Assistant II sa COMELEC-Iloilo City, iya ginpahayag nga may yara sang 63 ka voting center ukon mga eskwelahan nga gamiton sa syudad.
May yara sang 505 ka hulot ukon polling place para sa kabug-usan nga 330,470 ka registered voters.
May mga medical personnel nga amo ang in-charge sa temperature checks kag kun makit-an nga mataas ang temperatura sang botante kag may sintomas sang Covid-19, indi ini pag-iimpon sa iban bangud ibutang ini sa separado nga presinto.
May yara man sang tinawo halin sa City Engineer’s Office kag sa MORE Power para sa pagpasigurado sang electrical wirings kag suplay sang kuryente.
Ginahulat na lang subong ang pag-abot sang official ballots kag VCM ukon vote counting machines agud nga mapatigayon na ang mock elections.
Suno kay Sayno, na-train naman ang mga manunudlo nga amo ang maga-bulig sa tion sang eleksyon.
Sa adlaw sang piniliay, magabukas ang presinto 6:00 sa aga kag magasirado sa 7:00 sa gab-i.
Ginapangabay ang mga botante nga i-check na nga daan ang ila nga precinct number antes pa man ang Mayo 9 agud nga malikawan ang pagginutok sa mismo adlaw sang piniliay. ##
