10 ka adlaw pa lang ang “Hello, Love, Again” sa mga sinehan apang naagaw na sini ang titulo nga highest grossing Filipino film of all time.
Ini nga pelikula kun sa diin bida sanday Kathryn Bernardo kag Alden Richards ang naka-tipon na sang P930-million halin sa worldwide theatrical sales as of November 22, 7 p.m.
Ini nga box office title ang gin-uyatan anay sang 2023 Metro Manila Film Festival entry nga “Rewind” sang mag-asawa nga sanday Dingdong Dantes kag Marian Rivera. Ang “Rewind” amo ang first Filipino film nga nakakolekta sang masobra P900 million sa worldwide box office kag kabug-usan nga nakakuha sang P924 million sa bug-os nga theatrical run.
Apang sanday Kath kag Alden na subong ang bag-o nga box-office record holders nga yara subong sa United States agud magtambong sa 10th Asian World Film Festival sa Culver City, California kaupod ang iban nga cast members.
Ginalantaw nga mas magadaku pa ang income bangud ginapakita ang pelikula sa masobra 1,000 cinemas sa kalibutan lakip na sa US, Canada, United Kingdom, Australia, New Zealand, Saipan, kag Guam kag buksan man sa Asian countries (outside the Philippines) kag mga teritoryo sa masunod nga semana.
Ginhimo ang “Hello, Love, Again” sa idalom sang direksyon ni Cathy Garcia-Sampana kag amo ang sequel sa 2019 blockbuster movie nga “Hello, Love, Goodbye.”
Antes ini nga movie, isa lang ka pelikula sa masobra 40 local mainstream films sa Pilipinas nga ginpakita sang 2024 ang may mayo nga record sa box office kag ini amo ang Un/Happy for You sang mag-ex nga sanday Joshua Garcia kag Julia Barreto nga naka-P390 million sa ticket sales as of September 2.
