ILOILO CITY- Padayon pa nga ginapangita ang maglive-in partner nga nagbuno-patay sa ila man lang himata sa Barangay Bulak Sur, Batad, Iloilo.
Ang biktima amo si Bernardo de Juan,legal ang edad samtang ang suspek naman amo ang tiya sini nga si Alma Villanueva kag live-in partner nga si Reynaldo Maderaje.
Sa interview sang Bombo Radyo kay PLt. Jaypee Silvestre, hepe sang Batad Municipal Police Station, iya ginpahayag nga may nagluntad nga pagbinaisay sa tunga sang biktima kag mga suspetsado.
Suno kay Silvestre, sa ila pagpangusisa, may yara sang anak nga special child ang mag-asawa nga suspek.
Pahayag sang hepe, ginaatipan sang biktima ang amo nga bata apang wala ini nauyunan sang maglive-in partner tubtob nga natabo ang pagbaisay kag naglab-ot sa pagbuno sa biktima.
Pilas sa likod, tiyan, dughan, tangkugo kag ulo ang naangkon sang biktima nga amo ang gintunaan sang iya kamatayon.
Ginaimbestigaran pa sang otoridad ang posibilidad sang iban pa nga motibo kaangay sang daan nga hiligut-anon kun ngaa natabo ang krimen.
