ILOILO CITY – Mas maayo kun ipaiway anay sang mga pumuluyo sa syudad sang Iloilo ang pagkadto sa mga motel kag lodging houses para sa “hingalit nga kalipay”.
Ini ang ginahingyo sang Taskforce on Morals and Values Formation apisar napaidalom na sa Modified General Community Quarantine ang syudad umpisa sang Lunes, Hunyo 1.
Sa interview sang Bombo Radyo kay Taskforce on Morals and Values Formation Head Mr. Nestor Canong, iya ginpahayag nga yara sa gihapon ang coronavirus disease 2019 (COVID-19) kag indi ini matapna kun wala ginasunod sang mga tawo ang physical distancing.
Magluwas diri, apisar ginasunod sang mga establishments ang minimum public health standards, indi man sa gihapon mapat-od suno sa natungdan nga tuman na ka tinlo ang palibot.
Kanugon lang suno kay Canong ang mga sakripisyo sang nagligad nga mga bulan kag pag-agwanta sa coronavirus restrictions sa enhanced community quarantine (ECQ) kun magpabaya lang ang tanan subong nga tion.
Sa subong, padayon ang pag-monitor sang task force sa mga accomodation establishments agud mapat-od nga ginasunod ang mga protocol nga ginapatuman sang Inter-Agency Task Force for the Management of Emerging Infectious Diseases.
Nahibaluan nga santo sa Administrative Order 2020-002, ginpahayag sang Department of Tourism (DOT) nga ang accommodation establishments kaangay sang hotel, resort, tourist inn, pension house, homestay, kag iban pa nga establishemento nga naga-offer sang kaangay nga serbisyo ang mahimo makabaton sang guests para man sa trabaho ukon leisure SA KONDISYON nga sundon ang 50 percent operational capacity.
