Sa labing-una nga tion sa hampang sa FIBA, nasarangan sang Gilas Pilipinas nga lutuson ang longtime Oceania basketball powerhouse nga New Zealand.
Nahimo sang national team ang 93-89 nga maragtason nga kadalag-an subong nga gab-i, Nobyembre 21, sa Mall of Asia Arena sa second window sang 2025 Asia Cup Qualifiers.
Nanguna ang all-around performances nanday Justin Brownlee kag Kai Sotto agud ihatag sa mga Pinoy ang matam-is nga kadalag-an matapos masagang ang mga tres nga ginpangbuy-an sang foreign team sa first half.
Ini ang pinakamaayo nga performance ni Sotto sa national team nga may 19 points, 10 rebounds, kag 7 assists. Naghatag naman si Brownlee sang 26 points, 10 rebounds, 4 assists, kag 2 steals nga amo ang nagpasaka sang record sang Pilipinas sa malimpyo nga 3-0 sa Group B.
Si Sotto man ang nagpaulan sang lima ka sunod-sunod nga puntos sa kritikal nga 16-3 run antes nagsandig ang Gilas kay Brownlee sa fourth period. Indi man malimtan ang nangin bulig ni Chris Newsome ilabi na ang highlight nga tres nga amo ang naghatag sa Nationals sang 91-84 nga ligwa sa closing minutes sang hampang.
Sa Tall Blacks nga pang-22 sa world ranking, nanguna si Corey Webster nga may 25 points kag 5 assists. 2-1 subong ang ila record sa Group B.
Antes ini nga historic win, apat ka beses nga ginlutos sang New Zealand ang Gilas. Duha sa sini nga kalutusan ang na-eksperyensyahan sang Gilas diri mismo sa Pilipinas lakip ang 89-80 defeat sa FIBA Olympic Qualifying Tournament sang 2016 kag ang 88-63 nga tambak sa FIBA World Cup Qualifiers sang 2022.
The Scores
Philippines 93 – Brownlee 26, Sotto 19, Thompson 12, Newsome 11, Ramos 11, Fajardo 6, Perez 3, Oftana 3, Tamayo 2, Aguilar 0.
New Zealand 89 – Webster 25, Vodanovich 19, Waardenburg 19, Britt 8, Le’afa 6, Brown 5, Harris 3, Cameron 2, Harrison 2.
Quarters: 20-22, 45-45, 72-63, 93-89.
