ILOIO CITY – Mahimo nga mapilitan ang ethics committee sa House of Representatives nga i-rekomendar ang pagsipa kay Negros Oriental Representative Arnie Teves, Jr. bangud sa iya padayon nga pag-absent apisar sang expiration na sang iya travel authority.
Suno kay ethics committee panel chairperson Felimon Espares sang COOP-NATCCO party-list, ang desisyon ang magadepende sa paglantaw sang mga myembro sa sitwasyon kag sa mga updates sa kun ano ang matabo pagkatapos sang suspension.
Dugang pa niya, daw kaangay nga indi na interesado pa si Teves base sa iya mga ginapanghimo.
Nahibaluan nga duha na ka beses nga ginhatagan sang 60-day suspension ang kongresista kun sa diin, ang ikaduha ang maga-expire na sa Hulyo 31.
Si Teves ang wala pa nakabalik sa Pilipinas humalin sang gin-angut ini sang Justice department sa March 4 killing ni anay Negros Oriental Governor Roel Degamo.
Ini nga alegasyon ang ginpanginwala niya kag indi siya makapauli suno sa iya bangud sa mga pamahog sa iya kag sa kabuhi sang iya pamilya.
Liwat man nga ginpahayag ni Espares nga nagakadapat na nga magpauli si Teves kag magbalik sa trabaho sa Kongreso.
Suno pa sa natungdan, wala sang rason si Teves nga magpanago bangud nga wala sang warrant batuk sa iya.
Ang National Bureau of Investigation ang nag-file na sang kaso nga murder batuk kay Teves may kaangtanan sa pagpatay kay Degamo apang ang pila sa mga witnesses ang nagbawi sang ila nga pahayag.
Sang ginpamangkot naman si Espares kun ang arrest warrant nagikan sa korte ang magatulod sa Kongreso nga maghimo sang tikang batuk kay Teves, ginpahayag niya nga ang tikang sang Kamara ang magadepende sa gihapon sa madamo nga mga factors.
Ang jurisdiction sang chamber ang limitado lamang sa administrative aspect sang kaso.
