Nagpaandam ang Houthi rebels nga naka-base sa Yemen nga atakehon nila ang tanan nga barko nga pakadto sa Israel — wala sang labot kun ano man ang nationality sang mga sakay sini.
Suno sa mga opisyal sang amo nga grupo nga suportado sang Iran, paagi nila ini agud ipakita ang ila nga suporta sa mga Palestinians.
Pahayag pa sang Houthi military spokesperson, ginadumilian sa Red Sea kag sa Arabian Sea ang tanan nga barko nga nagapakadto sa mga pantalan sa Israel.
“If Gaza does not receive the food and medicine it needs, all ships in the Red Sea bound for Israeli ports, regardless of their nationality, will become a target for our armed forces,” pahayag sang spokesperson.
Ipatuman gilayon ini nga paandam suno pa sa statement.
Ang Houthis nga nagapugad sa kadam-an nga bahin sa Yemen kag sa Red Sea coast amo man ang nagbangga kag nag-hijack sa isa ka barko nga naangot sa Israeli company sang nagligad nga bulan.
Ang amo nga commercial ship nga ginatawag “Galaxy Leader” ang may yara sang 17 ka Filipino crew nga tubtub subong bihag gihapon sang mga rebelde sa Yemen.
Una na nga nagpahayag ang Israel nga ang pagpang-atake sa mga barko ang makabig nga “Iranian act of terrorism” nga may daku nga kunsekwensya sa international maritime security.
