Nagatuga sang pagsalangisag ang pahayag sang Department of Transportation (DOTr) kag Inter-Agency Task Force on Emerging Infectious Diseases (IATF) tuhoy sa ipatuman nga pagsulundan sa mga Public Utility Vehicles (PUVs) sa syudad sang Iloilo matapos ginpaidalum sa Modified General Community Quarantine (MGCQ).
Sa exclusive interview sang Bombo Radyo Iloilo kay Land Transportation Franchising and Regulatory Board (LTFRB) Region 6 Director Richard Sayco Osmeña, iya ginpahayag nga base sa ginpaggwa nga pagsulundan sang DOTr, nagakadapat nga ipatuman ang one seat apart samtang full capacity naman ang iya sang IATF.
Suno kay Osmeña, nagalingin ang iya ulo kun ano ang sundon nga guidelines sa pagsakay sa mga pampubliko nga salakyan.
Bangud sini, ginpakamaayo nalang sang natungdan nga magpadala sang sulat sa Central Office sang DOTr agud maathagan sa kun ano ang nagakadapat nga sundon.
Sa subong suno kay Osmeña, ginahulat nalang nila ang reply sang DOTr.
Nagpanugyan man si Osmeña nga sundon ang 7 commandments sang DOTr sa pagsakay sa pampubliko nga salakyan agud malikawan ang COVID-19.
Ini amo ang mga masunod:
1. Magsuksok sang face mask kag face shield;
2. Ginadumilian ang paghambal ukon pagasabat sa telepono;
3. Ginadumilian ang pagkaon;
4. Kinahanglan sang bastante nga ventilation;
5. Kinahanglan sang frequent disinfection;
6. Ginadumilian ang pagsakay sang symptomatic passenger;
7. Kinahanglan magsunod sa appropriate physical distancing
