Gindeklarar sang Russia nga “wanted” ang prosecutor sang International Criminal Court (ICC) nga amo anay ang nag-preparar sang warrant of arrest batok kay Russian President Vladimir Putin.
Nakit-an ang laragway ni Prosecutor Karim Khan sa database sang Russian Interior Ministry kun sa diin ginlaragway ini nga lalaki nga nabun-ag sang Marso 30, 1970 sa Edinburgh, Scotland apang wala man ginbutang kun ano gid ang partikular ang iya nga sala.
Matandaan nga sang Marso, nagpaguwa ang ICC sang arrest warrant batok kay Putin bangud sa iligal nga deportasyon sang linibo ka mga kabataan halin sa Ukraine.
Bangud sa amo nga warrant, mahimo nga madakop si Putin kun magbyahe ini sa mga pungsod nga myembro sang amo nga korte.
Matandaan nga sang amo nga tion, nag-imbestigar man ang Russia sa mga ICC personnel lakip na kay Khan bangud sa gin-alegar paghatag sang criminal responsibility sa ila ginpahayag “inosente” nga mga indibidwal. #
