ILOILO CITY – Ginpasalig ni Iloilo City Police Office (ICPO) Director Police Col. Martin Defensor Jr. nga solbaron ang kaso sa pagpatay sa magtiyo nga nasapwan sa Brgy. Balabago, Jaro, Iloilo City.
Ini matapos nga kasubong nga wala na sang pagsalig ang pamilya nanday Jimrod kag Tristan Eribal sa mahinay nga imbestigasyon sang Jaro PNP.
Sa interview sang Bombo Radyo kay Defensor, iya ginpahayag nga may yara na siya sang gintukod nga investigation team agud nga magtutuk sa pagpatay sa mga biktima.
Ugaling suno kay Defensor, nagpahayag ang pamilya Eribal nga magahatag lamang sang impormayson direkta sa iya kag indi na pag-ipaagi sa mga imbestigador ukon sa iban nga tawo.
May kaangtanan diri, ginpasalig naman sang ICPO director nga iya pamati-an kag buligan nga masolbar ang kaso kun magbulig man ang pamilya Eribal.
Ginkumpirma naman sang otoridad nga may yara sang grupo ang duha ka mga biktima nga naangot sa krimen sa syudad sang Iloilo.
Matandaan nga nasapwan na lang nga wala na sang kabuhi ang duha ka mga biktima nga tadtad sang luthang, nabaklid kag nabusalan sang packing tape.
