ILOILO CITY- Dismayado si Iloilo City Police Office (ICPO) Director PCol Leo Batiles sa traffic investigator sang Mandurriao Police Station nga si PMSgt Carl Petalco kasunod sang kontrobersyal nga pag-handle sini sa duha ka traffic accident sa Mandurriao kahapon.
Nahibaluan nga sa natabo nga bunggu-anay sang depampasahero nga jeep kag motorsiklo kun sa diin patay gid ang driver sang motorsiklo kag angkas sini, wala gin-detain ang driver sang jeep bangud nga may settlement.
Sa separado nga bungguanay naman sang isa ka motorsiklo kag isa ka pribado nga salakyan, may settlement man nga natabo kag apisar pa nga hubog ang driver sang private car, ginpapauli nalang ini ni Petalgo.
Sa interview sang Bombo Radyo kay PCol Leo Batiles, iya ginpahayag nga ginpatawag na niya si Petalco sa iya talatapan agud nga ipahangop sa iya ang husto nga proseso sang pag-uyat sang kasubong nga kaso.
Suno kay Batiles, ginpaidalom naman niya sa imbestigasyon si Petalgo kag ginpasabat agud ipaathag ang iya kaugalingon.
Panugyan sang ICPO Director sa tanan nga traffic investigators nga mas maayo nga kun may kasubong nga insidente,dal-on gid sa piskalya ang mga involved kag indi lang sa police station patigayunon ang settlement.
