ILOILO CITY – Nagsapol ang Iloilo City Police Office kag Covid-19 Team sang Iloilo City Government agud mas hugot nga ipatuman ang mga pagsulundan sang health protocols sa holiday season.
Sa exclusive interview sang Bombo Radyo kay Mr. Jeck Conlu, spokesperson sang COVID-19 Team sang Iloilo City Government, iya ginpahayag nga dumilian ang public consumption sang mga makahulubog nga ilimnon sa holidays.
Suno kay Conlu, padayon nga i-monitor ang mga lugar sa diin may mga nagatililipon kag naga-inom sa publiko.
Tubtob nalang suno kay Conlu alas 6:00 sang gab-i ang pagbakal sang ilimnon apang dapat i-consume ini sa sulod lamang sang panimalay.
Pahayag sang natungdan nga pasangkaron man ang police visibility kag pagbantay sang mga personnel sang Iloilo City Public Safety and Transportation Management Office.
