ILOILO CITY- Preparado na ang Iloilo City Police Office sa pagsugod sang pagpatuman sang border control sa Iloilo City umpisa 12:01 karon sa kaagahon may kaangtanan sa pagpaidalom sang syudad sa Modified Enhanced Community Quarantine.
Sa interview sang Bombo Radyo kay PCol. Uldarico Garbanzos ,director sang Iloilo City Police Office, iya ginpahayag nga may nadeploy na nga 200 ka mga police personnel sa mga border checkpoint areas sa palibot sang syudad partikular sa Barangays Lanit, Tagbak, Bitoon, Buhang kag Ungka sa Jaro;Calajunan kag Hibaoan sa Mandurriao; kag Sooc kag Mohon sa Arevalo.
Suno kay Garbanzos, ang mga tawo nga magapadulong sa syudad nga nalakip sa essential sectors ang kinahanglan nga magpakita gid sang identification card.
Nagpangabay naman ang ICPO director sa tanan nga indibidwal nga plano nga magsulod sa syudad sang Iloilo nga kon indi man sila essential, magpahimunong na lang sa ila balay.
Ginpanugyanan man niya ang mga pulis nga nagabantay sa checkpoints nga mangin matinahuron kag mapinasensyahon sa pag-eksplekar sa mga tawo angot sa border control.
