ILOILO – Pabor ang Iloilo City Police Office sa ginaduso ni Iloilo 3rd District Cong. Lorenz Defensor nga dapat ipaidalom sa seminar ang mga naga-apply sang driver’s license sa Land Transportation Office.
Sa interview sang Bombo Radyo kay Police Lt. Col. Efren Lozada, pinuno sang Traffic Investigation sang Iloilo City Police Office, iya ginpahayag nga mas makapaayo nga ipaidalom sa 3 tubtub 4 ka oras nga seminar ang driver’s license applicant agud nga mapahangop ang tuhoy sa traffic rules and regulations.
Suno kay Lozada, kun basehan ang record subong nga 2019, naglab-ot sa 2,280 ang kaso sang vehicular accident sa probinsya sang Iloilo ipaanggid sa 1,291 sang 2018.
Ginpahayag ni Lozada nga kalabanan sa mga naaksidente amo ang mga pribado nga salakyan, ginasundan sang motorsiklo kag mga pampubliko nga salakyan.
Indi mahinago suno sa natungdan nga ang iban sa mga driver nga nagaka-aksidente ang wala nagasunod sa traffic rules and regulations.
Isa man sa nakita nga solusyon ni Lozada amo nga dapat may yara sang revision ukon dapat nga amyendaran ang layi tuhoy sa pagpatuman sang layi batok sa traffic violators.
