ILOILO – Natalana nga magpa-gwa sang executive order (EO) si Igbaras Mayor Jaime Esmeralda bwas, Hunyo 2, agud temporaryo nga dumilian ang pagsulod kag pag-gwa sang mga pumuluyo sa nasambit nga banwa.
Ini ang kasunod sang pagpositibo sang isa ka 55-anyos nga lalaki sa amo nga lugar sa coronavirus disease 2019 (COVID-19).
Sa interview sang Bombo Radyo kay Esmeralda, iya ginkumpirma nga ‘connected’ sa local government unit (LGU) sang Igbaras ang amo nga pasyente (WV 114) apang nagpamalibad ang natungdan nga i-identify kun elected official ini ukon indi.
Suno kay Esmeralda, lauman man nga “mangin paralyzed anay” ang operasyon sang LGU partikular na ang Rural Health Unit (RHU), SB Office, kag Municipal Mayor’s Office samtang ginapatigayon ang contact tracing kag ginahulat ang test results sang mga naka-close contact sang pasyente.
Pahayag pa sang alkalde, bwas man nga adlaw maga-umpisa ang swab test para sa 100 ka nga tawo nga ginakabig “high risk”. Ini ang maga-lawig tubtob sa Mierkules, Hunyo 3.
Ini nga mga “high risk” nga mga tawo amo ang naka-close contact sang pasyente — kaupod sa trabaho, pamilya, kag naka-istorya sang masobra sa 15 minutos.
Ginpahayag man sang natungdan nga may yara na sila sang 100 ka test kits nga mahimo gamiton (50 ang yara na nga daan sa LGU kag 50 ang paagi sa bulig ni Iloilo 1st District Rep. Janette Garin).
Kun balik-balikan, santo sa pahayag ni Esmeralda, Mayo 1 pa ang katapusan nga travel sang COVID-19 patient kag ini amo ang pagkadto niya sa syudad sang Iloilo.
Magluwas diri, “wala naman ini nakalagaw sa iban pa nga lugar” bangud ginapahayag nga “opisina, balay kag balay, opisina” lamang ang iya nga gina-obra.
Bangud diri, nagapabilin nga isa ka palaligban para kay Esmeralda bangud isa na ka bulan ang nakaligad santo sa iya travel history, kag wala man ini naka-upod sa mga repatriated Overseas Filipino Workers (OFWs) ukon sin-o man nga suspected nga may yara sang amo nga virus.
Sa subong, asymptomatic ang pasyente ukon wala man nagabatyag sang sintomas sang COVID-19.
Ginpaidalom man ini kag ang iya pamilya sa ‘strict quarantine’ kag ang ila balay sa ‘strict lockdown’ agud malikawan ang paglapta pa sang balatian sa iban nga pumuluyo.
Nag-apelar naman si Esmeralda sa publiko nga likawan ang pag-discriminate sa COVID-19 patient kag sa iya pamilya, kag sa baylo, magpabilin lang anay sa balay kag magsunod sa protocols nga ginapanugyan sang Department of Health (DOH).
Nahibaluan nga sa kabug-usan, may yara na sang 114 ka kumpirmado nga kaso sang COVID-19 sa Western Visayas. Sa sini nga numero, 23 ang active cases, 81 ang naka-recover, kag napulo ang patay.
