Ika-7 nga pulong: ‘Amay, sa Imo mga kamot ginatugyan ko Ang Akon Espiritu’

Gin-gamit ni Msgr. Joemarie Delgado, Vicar General kag Parish Priest sang St. Anne Parish, Molo, Iloilo City ang iya tyempo sa Syete Palabras subong nga adlaw, Abril 3, agud isugid ang istorya sang isa ka tumuluo nga nagtaliwan nga may hugot nga pagtuo sa Diyos.

Istorya ini ni Carlene, 49-anyos, isa ka abyan ni Msgr. Delgado sa Parokya ni San Miguel, nga ginlubong sang nagligad lang nga Marso 26.

Suno kay Msgr. Delgado, gin-agda sang Jaro Archdiocesan Pastoral Secretariat (JAPS) si Carlene nga isa kuntani sa magapakigbahin sa Syete Palabras sa Jaro Metropolitan Cathedral subong nga Semana Santa.

Nakasabat pa ini nga: “For God’s Greatest Glory, Sir.” Apang lain ang plano sang Ginuo. Duha ka adlaw matapos ang iya sabat, nagtaliwan si Carlene.

“Now, I am standing before you to continue her unfinished narrative of faith as we reflect on this seventh last word [of Christ],” suno kay Msgr. Delgado nga amo ang nagpakigbahin sang repleksyon sa ika-pito nga pulong ni Kristo nga, ‘Amay, sa Imo mga kamot ginatugyan ko Ang Akon Espiritu.’

Nagsugod ang pag-abyanay nanday Msgr. Delgado kag Carlene 14 anyos na ang nagligad sang katapo si Carlene sang Flock of Divine Mercy nga mapisan nga naga-ugyon sa programa sang ebanghelisasyon sa amo nga parokya.

Apisar lain na ang assignment ni Msgr. Delgado, nangin regular ang ila komunikasyon gani nga nahangpan kag nabatyagan sang pari ang pagtuo ni Carlene sa pihak sang anum ka tuig nga pag-antos sang lupus nga isa ka chronic autoimmune disease.

“Ang masakit nga tayuyon, nagapahina sang aton kusog, nagapadula sang aton gana sa pagkaon, nagapaubos sang aton kwarta, kag kun kaisa, nagakatublag ang aton pagsalig sa Diyos. Gani kun may masakit kita, we found ourselves helpless,” suno kay Msgr. Delgado.

Apang sa baylo nga amo sini ang batyagon, tubtub sa iya katapusan nga ginhawa, gin-gamit ni Carlene ang iya tyempo para sa ebanghelisasyon.

Ginsugid ni Msgr. Delgado ang isa sa mga na-istorya ni Carlene: “I have been so ill lately with lupus flare. And I thought maybe, amo na ni, this is it, the dead end. But you know, the Lord told me in my prayer, he is not done with me yet. In my greatest pains, I thank God that he had made the hospital ward to be my place of evangelization.”

Pahayag ni Msgr. Delgado, nangin palaagyan si Carlene agud nga makatawag ang isa man ka pasyente sa pari para nga maka-kumpisar ini samtang yara sila sa ospital.

“In this hospital ward, He’s not only processing the healing of my physical body, but also my soul. It’s so sweet to be more in love with Jesus every day in pains and suffering,” suno kay Carlene, santo sa panugiron ni Msgr. Delgado.

Dugang sang pari: “Wala siya nag-focus sa iya lang kahimtangan. She turned her gaze on others, and so the hospital ward became a place of mission for her from God.”

Sa pagtapos sang iya repleksyon, ginpahangop ni Msgr. Delgado nga sa kada pag-antos sang tawo, may importante nga dapat tandaan: “With nothing on to cling on to, we realize we only live in the love of the Lord. Gani indi uyang kundi manggad ang aton pag-antos, kay ini nagapamanggaranon sa aton sa gugma sang Diyos.”

Gindumdom man sini si Carlene kag ang iya kabuhi — kag ang iya katapusan nga mensahe kay Msgr. Delgado antes siya nagsulod sa ganhaan sang kamatayon: “God will keep us in His love.”#