Ginkumpirma sang Department of Health ang ika-duha nga napatay bangud sa COVID-19 sa Pilipinas.
Ini ang 67-anyos nga babayi nga naka confine sa Manila Doctors Hospital.
Nahibaluan nga naconfine ang babayi sa nasambit nga hospital sang Pebrero 29 matapos nga makitaan sang simtomas sang COVID-19 kag nagpositibo sa nasambit nga virus sang Marso 11.
Ang 67-anyos nga babayi ang ika-35 sa listahan sang nagpositibo sa COVID-19 kag ika-labing una nga Pilipino nga napatay bangud sa nasambit nga balatian.
Suno sa Department of Health ginatipon pa nila ang mga detalye may kaangtanan sa nasambit nga pasyente.
Madumduman nga una na nga narekord sang DOH ang ika-labing una nga napatay bangud sa nasambit nga virus sa Pilipinas nga amo ang isa ka 44-anyos nga Chinese man.
Padayon naman ang panawagan sang Department of Health sa publiko nga likawan ang pagpalapta sang sala nga impormasyon sa social media may kaangtanan sa nasambit nga balatian kag basehan lang ang impormasyon sa ila nga official website.
Sa subong, may yara na sang 49 ka positibo nga kaso sang Coronavirus Disease sa Pilipinas matapos nga ginkumpirma sang Department of Health ang 16 ka dugang pa nga kaso sang nasambit nga balatian sa diin walo diri ang stable na ang kondisyon.
