Nadakpan na sang mga otoridad sa Austria ang ikatatlo nga suspek naangot sa Islamic State kag ginaalegar may plano kuntani nga magpatigayon sang suicide attack sa concert ni Taylor Swift sa Vienna.
Matandaan nga ginkanselar ang blockbuster nga “Eras” tour sang American music icon matapos nga nadakpan sang mga pulis ang duha ka suspek edad 19 kag 17 nga ginapahayag nagaplano nga magpatay sang mga tawo sa isa sa tatlo ka gigs ni Swift subong nga semana.
Kasunod sini, gin-anunsyo sang interior ministry nga gin-detain ang isa pa gid ka 18-anyos nga Iraqi nga suod sa main suspect kag may ginsumpaan nga allegiance sa Islamic State group.
Ang ginatumod nga main suspect amo ang 19-anyos, may North Macedonian roots, kag una na nag-ako sa otoridad nga may plano ini nga mag-atake gamit ang bomba kag mga kutsilyo.
Ang 17-anyos naman amo ang ikaduha nga suspek, isa ka Austrian nga may Turkish kag Croatian origin, nga gin-hire sang facility management company nga amo kuntani ang magahatag sang serbisyo sa Ernst Happel Stadium kun sa diin maga-perform si Swift.
Una naman ginpahayag ni Conservative Chancellor Karl Nehammer nga may nakaplastar na nga konkreto kag detalyado nga plano ang mga suspek nga magpabaha sang dugo sa amo nga aktibidad.
Antes sini, may duha ka pungsod nga amo ang naghatag sang impormasyon sa intelligence service sang Austrian army 10 tubtub 15 ka adlaw na ang nagligad rason nga napunggan ang atake.
Nahibaluan nga Huwebes tubtub Sabado kuntani ang schedule sang music superstar nga mag-perform sang tatlo ka shows sa Vienna.
Kabahin ini sang mega record-breaking nga “Eras” tour nga nasuguran an sa Paris sang Mayo kag nakaabot naman sa iban pa nga European countries nga amo ang Sweden, Portugal, Spain, the United Kingdom, Ireland, the Netherlands, Switzerland, Italy, Germany kag Poland.
