Nagguwa sa imbestigasyon nga may daan na nga record kag kilala sang US Secret Service kag Metropolitan Police Department ang suspek nga nagpaniro sa guwa sang White House kahapon.
Sandig sa US media, ang suspek gin-identify nga si Nasire Best, 21-anyos.
Nagpalupok siya gamit ang revolver pasado alas kuatro sang Sabado sang hapon, oras sa Washington D.C., gani nga nagbalos ang federal agents, kag sang ulihi, gin-deklarar ini nga patay na sa ospital.
Sandig sa record sa korte, ginbalabagan anay sang amo man nga lalaki ang vehicular traffic sang 2025 kag nagtuyo man nga magsulod sa White House Complex sang Hulyo 2025.
Sa amo nga insidente, gin-bypass ni Best ang restricted White House pedestrian control post kag naghimo sang lain-lain nga mga statement sang gin-detain siya sang D.C. police kag Secret Service agents.
Base sa court record, gina-claim sang suspek nga siya si Hesukristo kag gusto sini nga maaresto.
Gindakop siya sang officers sang amo nga tion kag sang ulihi gindala sa psychiatric facility.
Nagapuyo siya sa Washington DC sa sulod na sang 18 ka bulan.
Nahibaluan nga sa insidente kahapon, may isa man ka bystander nga nasamaran apang indi klaro kun halin ang bala sa suspek ukon sa security officers.
Kumpirmado man nga yara man si President Donald Trump sa sulod sang White House sang natabo ang insidente.
Natabo ini nga insidente halos isa ka bulan lang matapos ang shooting kag ginapahayag nga assassination attempt batok kay Trump sa isa ka dinner kaupod ang White House correspondents.#
