Indi lamang power interruptions ang epekto sang kakulang sang supply sang kuryente sa Visayas, kundi pati ang pagtaas sang presyo sang kuryente sa Wholesale Electricity Spot Market ukon WESM suno sa Institute of Contemporary Economics (ICE).
Sa interview sang Bombo Radyo kay Mr. Bonnie Ladrido, Executive Director sang ICE, iya ginpahayag nga ang kakulang sang available nga power supply ang nagapabatyag man sang epekto sa WESM, nga isa sa mga ginakuhaan sang supply sang mga power distribution utilities nga gina-distribute sa mga consumers.
Bangud sini, suno kay Ladrido, nagmahal man ang presyo sang kuryente sa merkado nga ginasabat sang Energy Regulatory Commission ukon ERC paagi sa pagpatuman sang regional secondary price cap agud mapunggan ang sobra nga pagsaka sang presyo sang kuryente sa Visayas.
Pahayag pa niya, importante ini nga tikang sang ERC bangud indi pareho ang sitwasyon sang power supply sa Luzon, Visayas kag Mindanao.
Ginpahayag man ni Ladrido nga sa ordinaryo nga pricing mechanism, ginakonsiderar ang supply kag demand sa kabug-usan sang Pilipinas.
Apang, bangud nagkalain-lain ang sitwasyon sang tagsa ka grid, mahimo nga maapektuhan ang presyo sa isa ka rehiyon sang sitwasyon sa iban nga bahin sang pungsod.
Pagpaathag pa niya, paagi sa regional secondary price cap, mas ginakunsiderar ang aktuwal nga sitwasyon sang power supply sa Visayas sa pagdeterminar sang presyo sang kuryente.
Dugang pa ni Ladrido, nagapakita ini nga kinahanglan kilalahanon ang nagkalain-lain nga sitwasyon sang tagsa ka energy market sa Luzon, Visayas kag Mindanao.
