ILOILO CITY- Tutukan sang newly elected councilor sang Iloilo City nga si Atty. Rex Sarabia ang problema sang mga fresh graduates nga indi gilayon makaangkon sang trabaho.
Sa interview sang Bombo Radyo kay Atty. Sarabia, iya ginpahayag nga madamo sang mga pumuluyo sa syudad nga highly educated apang wala sang demand ang ila nga mga kurso sa industriya.
Suno kay Sarabia, indi bastante nga mag-angkon lang sang edukasyon bangud nagakadapat nga may industrial demand ang kurso nga ginakuha.
Pahayag niya, tungdan niya ang papel sa paghibalo kun ano ang mga trends kag demands sang ekonomiya para maalalayan kag malaygayan ang mga pumuluyo kun ano nga mga in-demand nga mga skills kag professions ang ginakinanglan sa job market.
Dugang niya,kinahanglan man mag-invest ang syudad sa research and development paagi sa pagtukod sang Iloilo City Industry and Employment Advisory Council agud masigurado nga competitive kag moderno gihapon ang mga Ilonggo sa patag sang skills kag edukasyon agud masigurado nga masanag ang buwasdamlag sang mga pumuluyo sang syudad.
